Xiinxala Malawwan Barruu Barwalaloowwan Oromoo Filatamanii: Walunannaa

Abstract

 Kaayyoon qorannoo kanaa walunannaa barwalaloowwan Oromoo filatamanii xiinxaluudha.
Kana galmaan gahuufis, mala akkamtaafi saxaxa ibsaatu dhimma itti bahame. Barwalaloowwan
“abbaa hibboo”fi “Arraa Gurbaa!”tu erga sakatta‟insi kitaabotaa taasifamee mala
akkayyootiin filatame. Ragaaleenis, madda ragaa tokkoffaa irraa tooftaa xiinxala barruutiin
erga walitti qabamanii, garee gareetti qoqqoodamuun adeemsa addeessuu-xiinxaluumadaaluutiin yaaxxina akkaatummaa ulaagaa marmaarinsaafi faana dhooftummaatiin
xiinxalamuun argannoowwan kanatti aananii jiran argamaniiru. Walaloowwan filataman
keessatti marmaarinsi sagaleewwan dubbifamoo jalqaba jechootaa (allitireeshinii),
sagaleewwan dubbifamoo keessoo jechootaa (konsoonaansii)fi sagaleewwan dubbachiiftuu
(assoonaansii) walaloowwan lachuu keessatti hojiirra oolaniiru. Kun immoo, walalicha keessatti
walitti hidhaminsi yaadaafi yeedaloo akka uumamuuf haala mijeesseera. Rukuttaan manaa
jalqaba, gidduufi dhuma bo‟oowwan lamaanuu keessatti uumamaniiru. Bu‟aansaas, bo‟oowwan
walaloo gidduutti hariiroo dalgeefi gubbaa-gadii uumuun qindoominni yeedaloo nama
hawwatuufi qindoominni yaadaa wal qabataa ta‟an akka uumamuuf gargaareera. Marmaarinsa
sagaleewwan dubbiifi birsagaa kanneen gargaaramuun walaloo “abbaa hibboo” keessatti
ergaan yayyabame siyaasaafi hawaasummaadha. Agarsiiftuun kanaas, waldiduu gaaddidduufi
abbaa gaaddidduuti. Gaaddidduun akka isa eenyummaa ofii beekuufi abbaa gaaddidduu akka
isa of-arguu dadhabee garaaf jiraatuutti dhiyaataniiru. Walaloo “Arraa Gurbaa!” keessattis
ergaawwan (siyaasa, hawaasummaafi dinagdeetu) mul‟ateera. Kanaafis ka‟umsi, waldhabdee
Fattee, Allaattiifi Bofaati. Fatteen ummata cunqurfamaa ture (Oromoofi saboota biroo),
Allaattiin (abbootii irree) warra humnaan warra kaan caalaniifi Bofti (ummata shiraafi dabaan)
ummata garramiifi qulqulluu jedhamee dhiyaate cunqursaa turan ibsanii jiru.