Sabboonummaafi Lafa: Gahee Yaadannoofi Hariiroon Bakkaa Dammaqinsa Oromoof Gumaache, Asoosamoota Oromoo Filataman Keessatti

Abstract

 Kaayyoon qorannoo kanaa gahee yaadannoofi hariiroon bakkaa dammaqinsa uumuufi
sabboonummaa cimsuurratti qabu asoosamoota Oromoo filataman keessatti agarsiisuudha.
Kaayyoo kana galmaan gahuuf malli qorannoo akkamtaa hojiirra ooleera. Qorannoon kun
asoosamoota Oromoo lama: Godaannisaafi Yoomi Laataa?irratti kan hojjatame ta‟ee, tooftaan
iddatteessuu miticarraa-akkayyoon hojiirra ooleera. Danoomni barreessitootaa, barri
maxxansaa, qabiyyeefi seenessamni asoosamootaa wiirtuu ulaagaa filannoo ta‟aniiru. Ragaalee
seenessamaafi qabiyyee bu‟uureffachuun akkasumas, tooftaalee ogbarruu akka fakkoomii,
aguuggii, bakkabuusa, firoomina hafeefi waldubbisaa mala sakatta‟a dookimeentiin walitti
qabamuun hiikni xiinxala galumsa hafeen kennameera. Haala kanaan, ragaaleen asoosamootaa
xiinxalaman akka agarsiisanitti walitti hidhaminsi sabni Oromoo lafa isaa waliin qabu miiraafi
hariiroo bakkaa uumuun mul‟ateera. Hariiroofi miirri bakkaa uumame immoo yaadannoo
injifachuufi injifatamuu horateera. Yaadannoowwan kunneen dammaqinsa Oromoof hundee
ta‟uun hafeefi seenessama asoosamootaarraa mul‟ateera. Maqaa sabaafi gosaan laftiifi biyyi
moggaafamuun eenyummaan lafaafi namaa akka walqabatu taasiseera. Karaa namfakkiileefi
sansaka isaaniitiin falmiin lafa akaakileefi abaabilee irratti uumame dhaloota darbeefi dhufu
walitti hidheera. Walitti hidhaminsi lafaafi dhalootaa kun miirri „biyya abbaa‟ akka mul‟atu
taasiseera. Akkasumas, miirri injifachuufi injifatamuu lafarratti mudate bakka seenaa ta‟uun
dammaqinsa jabeessee sabboonummaa dagaagseera. Bakkeewwan kunneen dhaloota jidduutti
cancala ta‟uun jaatanii ogbarruu Oromoo keessatti akka qabiyyeefi seenessama ijoo
asoosamoota Oromootti dhihaataniiru. Kanaan asoosamoonni Oromoo ibsituu hariiroofi miira
bakkaa qofaa osoo hintaane, kuusaafi dabarsaa seenaa Oromoofi calaqqee sabboonummaa
Oromoo waan ta‟aniif xiyyeeffannoo qorannoos akka ta‟an akeeka.