Xiinxala Fakkoomii Dubartootaa Qoosaa Oromoo Maccaa Keessatti

Abstract

AXAREERAA 
Kaayyoon qorannoo kanaa fakkoomii dubartootaa qoosaa Oromoo Maccaa keessatti mul’atu 
xiinxaluudha. Qorannooleen addaddaa hanga sakatta’ametti, qoosaa Oromoo irratti (keessumaa 
kan Oromoo Maccaa) fakkoomii dubartootaan walqabatee qorannoon adeemsifame dhabamuun 
isaa qorannoon kun akka gaggeeffamuuf ka’umsa ta’ee jira.  Qorannichi gosa qorannoo 
akkamtaa bu’uureffatee gaggeeffame. Maddi ragaa qorannichaa madda ragaa tokkoffaadha. 
Ragaaleen qorannchaa godinoota afur: Horroo Guduruu Wallaggaa aanaa Amuruu, Wallaggaa 
Bahaa aanaa Guutoo Giddaa, Buunnoo Beddellee aanaa Beddelleefi Iluu Abbaa Boor aanaa 
Mattuu irraa funaanaman. Ragimtoonni qorannichaa namoota qoosaa qoosuu danda’an 
iddatteessuu kaayyeffataafi darbaa dabarsaan kanneen filatamanidha. Ragaaleen kunneen 
daawwannaa, marii garee xiyyeeffatamaafi afgaaffiin funaanaman. Ragaaleen sassaabaman 
mala xiinxala ergaatti fayyadamuun xiinxalaman. Gosti yaaxxinaa qorannichi irratti hundaa’ee 
gaggeeffame feminiizimiidha. Xiinxala taasisame irraa argannoon argame akka agarsiisutti 
dubartoonni: wantaa dhiirota gammachiisuuf tajaajilan; dharraa saalquunnamtii kanneen 
qabaniifi ejjitoota akka ta’anitti fakkeeffamuun qoosaa Oromoo Maccaa keessatti ibsamanii jiru. 
Ilaalchonni kunniin toofta ittiin dubartoota hacuucuuf dhimma itti ba’aman sababa ta’aniif utuu 
fooyya’anii gaarii ta’a.